بلاغ ناري من "كورفا سود" لرشيد الأندلسي

موقع شاهدنا

وجهت مجموعات الكورفا سود بلاغاً شديد اللهجة لرئيس فريق نادي الرجاء الرياضي لكرة القدم، رشيد الأندلسي، بعد خرجته الإعلامية و الغير محسوبة و التي وصف فيها جماهير النادي بأنها لم تقدم شيئا للفريق، و لا تعطي الحلول و أنها تكتفي فقط بالضغط و انتقاد سياسة الادارة.

وجاء هذا التصريح الغير مبرر من رشيد الأندلسي، فور تتويج النسور بلقب البطولة العربية للأندية البطلة على حساب الاتحاد السعودي بركلات الترجيح بعد نهاية المباراة بالتعادل الايجابي أربعة لأربعة، وبعد هذا التتويج ضمن الرجاء منحة الفوز و المقدرة بستة ملايين دولار قادرة على حل أزمة الرجاء الرياضي المالية و استخلاص جميع النزاعات مع لاعبيه السابقين.

بلاغ الكورفا سود :

إلى ما يسمى " الرئيس المؤقت"

عطيتي 8 أشهر من حياتك للرجاء، كاين لي ضربها غا حبس، باش عاونتي الفرقة نتا باش تقول الجمهور ما عاونش الفرقة ؟

جمهورها راس مالها، هو لي ما هبطش يديه من لي بدات الأزمة لدابا، ماشي كانمنو على الفرقة ولكن راه ماشي نتا لي شريتي وراق أيام الويكلو، ماشي نتا لي كل عام كاتدير بطاقة الإشتراك، ماشي نتا لي كنتي كاتدخل للتيران بخمسين درهم، أكفس من هادشي، ماشي حتى نتا لي جبتي طيارة لزامبيا، بل المجموعات و المنخرطين، الجمهور يكفيه أنه ماشي سبب مهزلة تونغيت، هاديك بوحدها خاصك تقلب بسببها على الشأن الرياضي.

نهار الإجتماعات لي تدارو مع المجموعات على ود تسيير الفرقة، كنتي كاتدوي بحال الكلب، وصلو الفلوس بانو نيابك، خصوصاً نتا عارف دونور مسدود، أما كون "صدعو ليك راسك."

علاش تحسب لراسك هاد الكأس، و ماتحسبش لراسك ديون أغلب هادوك لي مشات عليهم ميزانية ف النزاعات، حتى لي ماكنتيش فالعهد ديالو رئيس راك كنتي ف المكتب.

العام لي قبل وصلو البطاقات ل 13000 علاش ف نظرك هاد العام وصلنا غير لثلث هاد العدد، حيت الثقة فيك مابقاتش عند الرجاويين، وكانعدروهم حيت ملي كاتشوف رئيس كايصرح بحاجة و مورا 3 أيام كايطرا العكس راه باينة هاد الرئيس ما دار حتى حاجة باش يآمن بيه ولا يتيق بيه بنادم يعطيه رزقو فالتذاكر لي جاو من بعد، نهار تمشيو جمهور الرجا غادي يدير 20 ألف بطاقة.

كنتي كاتقول تضررنا من غياب الجماهير، بلاصة ما تنوض تلقى صيغة تهبط بها الصاليرات الخرافية ديال شي لعابة مايستاهلو حتى الربع، الاستراتيجية الوحيدة لي لقيتي هي لعب دور الضحية و البطل ف نفس الوقت.

اما المنخرطين، عمرهم نتافضو، اللهم قضية اجتماع قالو بلي على ود الانتدابات لكن ف الحقيقة كان غير للمطالبة بالحضور ف النهائي، النتيجة قدامكم : صمت المنخرطين و وحدين أخرين كايقلبو على مناصب مستقبلية و وحدين لطالما هاجمو الرؤساء السابقين سكتو دبا بحال إلا النادي ماكايعيش حتى مشاكل.

ما بقا عندك ماتزيدنا من غير المونتيف.